Tonhito de Poi e Cristina Morquillas preséntannos ‘Psicodelia‘, o primeiro EP de Poi. O cuarteto mestura rock e electrónica nun son que denominan ‘poi-floyd’ e recolle nas súas letras unha busca espiritual que conecta co chamanismo. O disco ábrese coa canción ‘Delirando‘, na que colabora Javi Maneiro, de Heredeiros da Crus. 

Ribadeo homenaxea a Xavier Miró, óptico xubilado da localidade que agacha tamén un pasado como músico. Entre o ano 1969 e 1973 Miró conseguiu entrar nas listas de éxitos cantando en galego, como parte do dúo ‘María e Xavier‘. ‘Miña ruliña‘ e ‘Brila raio da aurora’ foron os seus temas máis coñecidos. O auditorio ribadense Hernán Naval acolle o sábado 15 de abril un encontro de homenaxe no que participarán Guadi Galego e máis dun cento de músicos da Mariña. Conversamos con Ugia Pedreira, unha das directoras do acto, e co propio Xavier Miró.