A cuadraxésimo quinta edición da Semana de Cine de Lugo inclúe unha retrospectiva dos irmáns Jorge e Pepe Coira, que incluirá a proxección de películas, series e documentais dirixidos, guionizados ou producidos por eles, un libro e unha exposición. O certame proxectará ata o sábado 135 filmes nas súas diferentes seccións, como as dedicadas ao cine galego, curtametraxes, documentais, películas infantís ou as seis películas da sección oficial. 

No seo da 28ª edición do Ourense Film Festival, Chema Prado presenta Series, unha mostra que nos conduce pola súa experiencia vital e profesional en imaxes. Prado é un referente no sector cinematográfico dende hai décadas, non só no país, senón tamén no ámbito internacional. Foi durante 27 anos director da Filmoteca Española.

Aínda que o festival de cine comeza o 29 de setembro, esta exposición pode visitarse no Centro Cultural Marcos Valcárcel ata o 12 de novembro.

A violonchelista Alejandra Díaz presenta o seu primeiro disco, Berce, unha mirada ás raíces inspirada pola música popular galega. Entre as nove pezas do disco hai versións para violonchelo da Carolina, as muiñeiras de Lugo e Chantada ou Alalá das Mariñas, e ata un encontro entre a Rianxeira e a Zarabanda de Bach. Dúas das pezas de Berce contan co piano e os arranxos de Juan Durán.

A Noite do Patrimonio é un evento que nacía no 2018 para celebrar o XXV aniversario do Grupo Cidades Patrimonio da Humanidade de España. Todo isto, co obxectivo de poñer en valor a diversidade e o patrimonio vivo das 15 cidades a través de talentos locais, expresións culturais, etc.

Desta volta, celébrase o 30 aniversario e Santiago de Compostela acollerá mañá unha gran programación para celebrar esta cita especial.