A lenda da loba branca do Courel cóntanos que nunha aldea da montaña unha manada de lobos tiña por xefa a esta gran loba. Pero houbo unha batida de cazadores e matárona. Os lobos comezaron entón a ouvear nas portas dos veciños cada noite. Ninguén sabía que ocorría, ata que unha muller, da que se dicía que era meiga, advertiu que o que os lobos querían era a pel da súa xefa. Os cazadores deixárona nun claro do bosque, iluminado pola lúa, e os lobos non volveron á aldea.

É unha lenda recollida en diferentes formas, e por diferentes persoas, Vicente Risco entre elas; que sirve de argumento á primeira ópera do pianista e compositor vigués Brais González. Este domingo, terá a súa estrea en galego e italiano no Festival delle Nazione de Città di Castello.

Na década dos anos 20 do século pasado a fotógrafa e investigadora estadounidense Ruth Matilda Anderson chegou a Galicia como enviada da Hispanic Society of America. A súa misión era retratar as vestimentas tradicionais, as empregadas para traballar e as dos días de festa. Hoxe, as súas imaxes representan unha fonte importantísima de información da forma de vida da Galicia rural e urbana daquel tempo.

Imos ata o Museo de Pontevedra, porque alí pódese ver ata o 16 de outubro a mostra ‘Ruth Matilda Anderson. Unha viaxe pola indumentaria tradicional de Galicia’, que reúne as fotografías de Anderson cos traxes recuperados e contextualizados pola Asociación Etnográfica Sete Espadelas. Na mostra podemos observar os anos nos que Galicia transicionaba entre a tradición e a modernidade, prestando especial atención ao traxe feminino.