Ata o domingo 25 de setembro o festival Maré reúne en Santiago músicos do Brasil, India, Arxentina, o Sahara… e de Galicia. Nomes como Chico César, Pongo, Abe Rábade, Dios ke te Crew, Ugia Pedreira, Guadi Galego actúan en diferentes espazos da cidade.

Vituco Neira debulla a programación do festival con Valeria Pereiras e conversa coa artista Catuxa Salom e con Peter Brea de Tropico de Grelos. 

Acaba de estrearse o documental ‘Ciudad de la Selva. Fuxidos e guerrilleiros nos montes de Casaio‘, que recupera a historia dun importante campamento guerrilleiro instalado nos montes de Valdeorras entre 1941 e 1946. Cos testemuños da veciñanza, investigadores no terreo e as imaxes dunha paisaxe sobrecolledora, cóntase a repercusión na poboación local daquela fronte de guerra que mantivo activa ata mediados dos anos corenta a Federación de Guerrillas de León-Galicia. Conversamos con Miguel Riaño, director e produtor do documental, e con Carlos Tejerizo, director das escavacións arqueolóxicas en Casaio, impulsadas polo proxecto Sputnik Labrego. 

Conversamos con Xabier Cid e Ana Fontal, dous dos participantes do club de lectura Diáspora, que reúne telematicamente persoas que viven fóra de Galicia para compartir e comentar literatura en galego. O club acaba de estrearse neste mes de setembro co libro ‘Virtudes (e misterios)’ de Xesús Fraga.