Producida pola Fundación La Caixa dentro do seu programa Arte na rúa, esta mostra está composta por 38 fotografías de gran formato e forman parte do último proxecto realizado polo fotógrafo brasileiro Sebastiao Salgado. Entre os anos 2004 e 2012, Salgado estivo seguindo as pegadas de Darwin e realizou este ambicioso proxecto ao longo de todo o planeta para retratar a natureza en toda a súa grandeza e esplendor.

Realizou un total de 32 viaxes, con paradas na Antártida, Madagascar, Botsuana, o Parque Nacional de Kafue de Zambia, a meseta do Colorado nos Estados Unidos, Alaska, o arquipélago das Galápagos no Ecuador, Siberia e a selva do Amazonas, entre outros.

Con recoñecementos como o Premio Príncipe de Asturias das Artes en 1998, Sebastião Salgado é, probablemente, un dos fotógrafos vivos máis famosos e recoñecido polo público xeral. Dentro do mundo da fotografia sociodocumental, Salgado desenvolveu un traballo fotográfico que se centrou arredor de cuestións como as migracións, o traballo e a relación do ser humano coa terra e a natureza.

As súas fotos sempre en branco e negro, ademais dunha gran espectacularidade teñen unha excelente composición e unha coidada técnica.

Esta exposición, comisariada por Lélia Wanick Salgado, é unha testemuña dunha larga coexistencia dos humanos coa natureza e unha oda visual a un mundo que debemos protexer.