Armando Requeixo achéganos unha novela sober o amor e sobre a música, pero tamén sobre a resiliencia en tempos difíciles como os da inmediata posguerra.
Música para os días de inverno, de Pablo Nogueira, destaca pola coidada caracterización da época e pola axilidade na progresión da trama.
Armando Requeixo destaca esta semana o libro de relatos Silencio, de Agustín Agra e editado por Galaxia.
Trátase dunha obra que dá vida a grandes figuras das ciencias como Newton, Galilia ou Copérnico desde un punto de vista máis humano. Escritos con técnicas e voces diversas, todas estas historias poñen de relevo a revolución que o pensamento destas mentes privilexiadas supuxo para a Humanidade.
Todas as vidas é un conxunto de oito narracións que Xosé Ramón Pena vén de publicar en Xerais. Inspirado pola canción de Joaquín Sabina ‘La del pirata cojo’.
Un lexionario por Melilla, os púxiles do Ximnasio Detroit, a raíña de Svanetia ou a amizade entre un crego e un comunista: “todas as vidas” collen neste libro de Xosé Ramón Pena, como canta Joaquín Sabina.
Un comentario de Armando Requeixo.
Escrito por María López Sández e ilustrado por Miguel Muñiz, nas páxinas de Illados. Diario da pandemia conxúgase o ensaio narrativo e o fotoxornalismo: a recomendación desta semana de Armando Requeixo.
A través de oito breves textos, López Sández percorre diversos aspectos relacionados coa pandemia, que pon en relación con lecturas, vivencias e reflexións, ao tempo que conecta todo co relato fotográfico que Muñiz foi facendo nestes meses de pandemia.
Viaxe ao terror da guerra siria na novela O paraíso dos inocentes, de Antón Riveiro Coello.
Esta semana Armando Requeixo proponnos a lectura de Once contos peregrinos de Vanessa Fernández Segura.
Once contos peregrinos (Toxosoutos) supón a estrea narrativa de Vanessa Fernández Segura, quen ofrece aquí un conxunto de historias en edición bilingüe galego-inglesa e prólogo e imaxe de cuberta de Javier Blanco Vázquez.
Os relatos de Fernández Segura afondan no mistérico e sorprendente do ultramundo galego, facendo convivir a parroquia dos vivos coa dos mortos e volvendo a ollada a esa Galicia inmaterial na que deambulan, con absoluta naturalidade, a Santa Compaña, os cambións, as meigas ou os lobishomes, entre moitos outros seres máxicos.
Non fales o que non debes (Xerais) achéganos a historia dun maxistrado dunha cidade galega que se suicida xusto no momento no que no seu Xulgado de Instrución se está a investigar a complexa Operación Táchira. A morte do xuíz, unida ao suicidio nos calabozos da comisaría da cidade dun concelleiro preventivamente detido pola súa suposta implicación nos delitos investigados na operación, disparará as sospeitas de que estas mortes non son casuais, fío do que tira o tenaz xornalista Aquem, alias Vagalume, para tratar de desvelar as razóns que se agochan tras as súas desaparicións.
Que pasou realmente? Que esconden estes suicidios e cales foron as relacións dos finados coas persoas que os rodeaban? Pode sobrevivir a Ética en río tan avolto?
Esta semana Armando Requeixo convídanos a ler a última novela de Ignacio Vidal Portabales: Lara e Sabela.
A historia que Lara e Sabela (Xerais) desenvolve preséntanos á propietaria dunha galería de Arte, Sabela, que namora dunha das pintoras que representa, Lara, e intenta conquistala aproveitando que esta fica soa ao lle morrer o marido.
Novela de amor e de humor, Lara e Sabela achéganos ao complexo mundo dos circuítos profesionais de Arte e pon ao descuberto a fina liña que separa a ética e a estética nestes eidos.
Esta semana Armando Requeixo rende homenaxe na súa colaboración ao intelectual galeguista Isaac Díaz Pardo por mor da celebración, en días pasados, do centenario do seu nacemento. Con tal motivo, convídanos a coñecer dous títulos arredor da súa figura: Homes de palabra. Conversas con Isaac Díaz Pardo e Xosé Neira Vilas,de Paco López-Barxas, e mais Isaac Díaz Pardo. Correspondenciacon Carmen Blanco e Claudio Rodríguez Fer.
Esta semana Armando Requeixo tráenos dúas propostas narrativas ben diversas: dunha banda, a novela O libro da filla, de Inma López Silva, e, doutra, o relato A incríbel viaxe de Noa, de Fernando M. Cimadevila.
O libro da filla (Galaxia) é un relato social e intimista, onde unha trama familiar e particular lle serve á autora para propor unha revisión en clave xeral e pública: unha prestixiosa xornalista, Helena Sánchez, acepta investigar o caso de Fernando, que sofre condena por agresión sexual á súa filla. A intención é que a reportaxe xornalística lle sirva para restaurar a súa imaxe e axudar a eximilo, pero pronto a periodista vai bater co dificultoso desentrañamento dunha verdade escura, na que non se sabe ben se existe ou non o complot entre a ex-muller de Fernando e a súa filla, tal como el defende, ou a condena é xusta. Polo camiño cruzan as fías do totalitarismo neofascista da extrema dereita e das complexidades dun amor non sempre ben entendido. Unha novela que entrelaza as fías do sentimental e do político para poñer ao descuberto as miserias da sociedade que nos acubilla.
A incríbel viaxe de Noa (Contos Estraños) é o relato dunha aventura pola supervivencia nun mundo postapocalíptico. A historia de Noa, unha rapaza que tenta fuxir da Urbe ata un lugar arredado do centro dunha civilización agresivamente hipertecnoloxizada, sérvella a Cimadevila para facernos reflexionar sobre o perigo dos extremos antiecolóxicos nos que o ser humano se move ao tempo que propón unha narración de aventuras engaiolante, protagonizada por unha afouta moza e o seu can, acompañados dun robot. Unha historia que acusa a pegada do director xaponés e debuxante Hayao Miyazaki e que tira proveito do recurso ao manuscrito atopado e o intelixente xogo de planos temporais.