Esta semana Armando Requeixo achéganos á lectura de O baile, a coñecida novela de Irène Némirovsky que acaba de ser traducida ao galego por Moisés Barcia para a Editorial Rinoceronte.

O baile mergúllanos no fastoso París de comezos do século XX da man de Antoinette, a filla dos adiñeirados señores Kampf, unha moza á que súa nai humilla tratándoa de xeito asoballador e seu pai simplemente obvia. Nese contexto tan pouco edificante, Antoinette, ferida no máis fondo do ser, tratará de se vingar.

Escrita cun estilo moi depurado, de traballada sinxeleza, esta novela breve é todo un clásico da escrita europea do seu tempo que, por fortuna, podemos ler xa na nosa lingua.

Esta semana Armando Requeixo convídanos a ler A afogada, a máis recente novela de Rocío Leira. A afogada (Xerais) é o título co que a profesora e escritora ceense Rocío Leira obtivo o XXII Premio Ánxel Fole de Narración Curta do Concello de Lugo.

Laura Suárez, a protagonista desta historia, é unha moza superdotada con dificultades de adaptación social que unha noite de outubro desaparece entre as ondas bravas de Riazor ante a ollada expectante da súa mellor amiga e do seu mozo. Mais o que de primeiras semella un triste accidente, pronto vai adquirir outro cariz cando, ao pasar dos días, o cadáver da rapaza non aparece e Manuel Cifuentes, o experimentado mergullador responsable do caso, comece a ter serias dúbidas de que fose un afogamento.

Esta semana Armando Requeixo achéganos á lectura de Destempo, a máis recente novela de Silvia Bardelás.

Destempo (Barbantesa) é á vez o relato dun reencontro e dun desencontro: o dunha avoa que lle pide ao seu neto que regrese a Galicia dende EE.UU. para pasar con ela un verán que acaba por mudar a vida de ambos os dous.

Narración chea de reflexións sobre o paso do tempo, o sentido da existencia, o sentimento de pertenza a un lugar e unha familia e tamén de consideracións sobre a identidade, a capacidade de mudar o noso destino e as idealizacións do pasado, esta historia é un canto á loita polas revolucións interiores e o afán por liberarnos dos atumes vitais que nos aferrollan.

Esta semana Armando Requeixo convídanos a recuperar a lectura de O retorno dos homes mariños, a obra coa que Xurxo Souto comezou a súa andaina novelística hai máis de dúas décadas e que agora volve reeditarse.

O retorno dos homes mariños (Xerais) é o relato dunha Coruña atlántica, enxebre e bravú da man de dous personaxes ben xenuínos: Mercedes, unha moza heavy que traballa nun taller téxtil do Orzán para Inditex e soña con percorrer o mundo sendo unha estrela musical, e mais Eco, coñecido polo sobrenome de O Agoiro das Lagoas, un rapaz que estudou FP porque quería ser antenista nun momento no que a televisión por cable vai invadíndoo todo.

Ambos os dous personaxes teñen unha especial conexión cos homes mariños, uns seres metade humanos metade peixes que poboan as costas coruñesas e que se deixan ver en contadas ocasións.

Esta semana Armando Requeixo convídanos a mergullarnos na lectura de A realidade, a máis recente novela de Manuel Darriba.

“A realidade (Xerais) achéganos ao deambular de Ganzúa, un escritor frustrado que, nun escenario futurista e caótico, percorre as rúas dunha cidade innominada cruzándose con diversos personaxes namentres lembra a súa vida pasada, imaxina o seu final e tenta sobrevivir cando está a punto de se desatar unha revolta civil entre clases sociais.

Innovadora e desacougante, esta narración debuxa un futuro caótico no que seguen a palpitar as grandes interrogantes de todo tempo: que é o real? cal é a nosa verdadeira identidade? e que sentido ten a nosa viaxe vital?”

Esta semana Armando Requeixo convídanos á lecutura de Cicatrices do aire de Emma Pedreira.

Cicatrices do aire (Toxosoutos) é a novela curta coa que Emma Pedreira gañou o XIX Certame literario de Relato de Aventuras Antón Avilés de Taramancos.

Un enigmática anciá centenaria é a protagonista desta historia. Cega e vagabunda, a súa vida consiste en ir contando historias a cambio dunha sede de auga, un codelo de pan e a vontade. E iso é o que fai cando chega á porta da casa dunha familia e senta nun escano baixo unha laranxeira para comezar a contar e cambialo todo…

Esta semana Armando Requeixo dá noticia da aparición de Rapazas de Polar, a máis recente novela de Eva Moreda. Rapazas de Polar (Morgante) nárranos as aventuras dun grupo de rapazas dun internado galego en tempos da Guerra Civil e a inmediata Posguerra.

Novela de formación, o realismo das súas páxinas non refuga certas pingas de fantasía para construír un retrato epocal no que se deitan, transversalmente, interesantes reflexións sobre cuestións como o papel da Igrexa, os marcados roles da muller e o home nestes anos ou o illamento deste tipo de centros respecto das circunstancias sociais que os rodeaban.

Esta semana Armando Requeixo fálanos de ‘Libres e vivas’, un volume de relatos publicado pola Editorial Galaxia.

‘Libres e vivas’ reúne dez historias doutras tantas escritoras galegas do momento: Anxos Sumai, Berta Dávila, Charo Pita, Elisabeth Oliveira, Esther F. Carrodeguas, María Canosa, María López Sández, María Xosé Porteiro, Mercedes Queixas e Paula Carballeira.

Relatos moi diferentes tanto polas súas temáticas coma polo seu estilo, coinciden todos eles no protagonismo da muller nas súas tramas e na reivindicación das causas feministas, no desexo dunha sociedade na que as mulleres poidan sentirse, como anuncia o título da obra, verdadeiramente libres e vivas.

Esta semana Armando Requeixo proponnos a lectura dun libro ben singular: Orixe orzánica das sereas todas de Rodrigo Osorio.

Orixe orzánica das sereas todas (Alvarellos) é unha ucronía. É dicir, unha narración imaxinaria do que puido ser e non foi. Neste caso, Rodrigo Osorio fabula cunha Galicia onde a Guerra Civil non tivo lugar e, en consecuencia, tampouco se viviu a longa posguerra franquista.

Nesa Galicia ideal o gran pintor Urbano Lugrís ingresa na Academia Galega da Lingua en 1953 lendo un discurso sobre a natureza das sereas e o seu vínculo coa beiramar coruñesa. Un discurso, por certo, ao que responde o escritor Leandro Carré Alvarellos, engadindo así novos argumentos a este relato desbordante de imaxinación e de fondo alento mitolóxico.

Armando Requeixo trae da man unha nova lectura coa que tentar seducirnos: Corazón de manteiga, de Xavier Queipo.

Corazón de manteiga (Galaxia) é o relato intimista dunha vida, a do neno Mauro no corazón das terras do Sar, que logo é mozo na Compostela dos xardíns de Bonaval e adulto nos imposibles corredores do Psiquiátrico de Conxo.

Escrito con admirable capacidade evocativa, pouso lírico e reveladora instrospección psicolóxica, esta novela resulta unha intensa viaxe nos labirintos do eu.