‘A velocidade crítica’

Esta semana Armando Requeixo achéganos a ‘Algúns contos completos’, o novo libro de Domingo Villar.

‘Algúns contos completos’ (Galaxia) reúne unha decena de relatos escritos por Villar ao longo de anos, a maioría deles inéditos, algúns outros avanzados nalgún xornal e todos nacidos como narracións orais coas que entreter as xuntanzas familiares.

Estas historias amosan un mundo creativo moi diferente ao do Villar autor de novela negra ao que estamos afeitos. Nestes textos o melancólico, o insólito e o humorístico amalgámanse para tecer un universo propio, con protagonistas fascinantes que nos abraian na súa aventura dun vivir fóra do común.

Esta semana Armando Requeixo mergulla no ‘Trávelin’ de Antonio Piñeiro, a narración gañadora do último Premio de Novela Curta Manuel Lueiro Rey.

‘Trávelin’ (Xerais) é o relato dunha investigación policial e xornalística na Compostela dos anos oitenta. Mais é, sobre todo, o retrato dunha época: o Santiago das riadas estudantís das noites dos xoves, do medre incontrolado dos arrabaldes e de toda a fauna adicta que habitou as marxes daquel tempo.

Escrita cunha prosa de extraordinaria precisión e beleza, esta novela destila melancolía pola memoria do que foi e os amores mancados que perdemos polo camiño.

‘A conxura’, entre soño e realidade

Esta semana Armando Requeixo convida á lectura de Alén, o novo libro da narradora viguesa María Alonso Alonso.

Alén (Bolanda) reúne tres relatos longos que xiran arredor do mundo da emigración en tres tempos: o pasado (a emigración a América nos tempos da Posguerra), o presente (a emigración ás Illas británicas nos nosos días) e o futuro (as migracións a lugares refuxio nun futuro planeta terra devastado).

Estas tres historias, malia a súa aparente diversidade, converxen na reflexión que propoñen sobre cuestións esenciais do ser humano, como a loita pola supervivencia, o sentimento de medo e orfandade, a angustia que se abre coa morriña, a dolorosa consciencia de sentirse estranxeiro en terra allea ou o decisivo de non perder as raíces e a conexión cos eidos natais. 

Esta semana Armando Requeixo convídanos á lectura da novela As nosas normas de Carl Jonas Love Almqvist, un clásico da literatura sueca do XIX.

As nosas normas (Hugin e Munin) é unha narración curta que foi traducida ao galego por Marta Dahlgren, quen nos achega esta historia pioneira na loita pola igualdade xenérica.

Publicada orixinariamente en 1839, o relato do encontro entre o sarxento Albert e a comerciante Sara Videbeck e o seu namoramento durante unha viaxe en barco cruzando o lago Mälaren sorprende pola temperá reivindicación de valores como a distinción entre sexo e matrimonio, a libre unión ou a separación de bens.

Esta semana Armando Requeixo achégase á lectura de A forma de Célebes, unha novela do xornalista Iago Méndez.

A forma de Célebes (Galaxia) é o relato dunha historia familiar, das sombras que medran mesmo entre os seres máis próximos e das sorpresas que poden chegar a darnos aqueles que tan ben pareciamos coñecer.

Tamén si, esta narración supón un mergullo realidades como a violencia estrutural, a soidade dos maiores, a lacra das drogas, as dificultades da emigración e outras circunstancias sociais que cercan a vida de moitas máis persoas das que sospeitamos. Un relato tan duro coma revelador.

Esta semana Armando Requeixo dá noticia de Trobar do ar, o novo libro de Xosé Manuel Lobato.

Trobar do ar (Medulia) é unha narración dividida en nove capítulos protagonizados por Aires Ulla do Pico, un imaxinario trobador de fins do século XII e primeiros do XIII criado á beira do Pico Sacro, ao que figura unido por un intenso e máxico vencello que se estende á súa conexión telúrica co Ulla e todo o val que este domina. 

Escrita cunha prosa requintada, esmaltada de alusións cultas e referencias a diferentes persoeiros das nosas letras, esta narración salienta polo seu forte simbolismo e a suxestiva recreación do tempo e do mundo dos trobadores.