‘Nin principio nin fin. Unha paisaxe á deriva’ é o título da exposición de Françoise Vanneraud que a Fundación Didac exhibe en Santiago ata o 17 de setembro. A artista francesa traballa o tempo e a paisaxe como territorio e narrativa histórica e memoria a través da fotografía, o debuxo, a pintura e a instalación. 

Mónica Maneiro comenta a mostra retrospectiva de Almudena Fernández Fariña no CGAC. ‘Pisando charcos’, comisariada por Susana Cendán, pode visitarse ata o 10 de setembro.

Mónica Maneiro comenta a mostra ‘Lindeira’, da artista murciana Sonia Navarro, que pode visitarse na galería Vilaseco da Coruña ata o 27 de xullo. A exposición fala dos lindes que a sociedade impoñía aos espazos que podían ocupar as mulleres e pon no centro actividades e materiais relacionadas coa costura e a patronaxe. 

Mónica Maneiro guíanos hoxe a través da exposición ‘El Siempre Mar‘, da artista e ceramista coruñesa Verónica Moar, que pode visitarse na galería madrileña Ponce & Robles. Unha mostra na que o mar é protagonista e que nos fai cuestionarnos a súa natureza. Moar parte dunha técnica depurada como artesá para mostrarnos unha serie de fragmentos que piden ser contemplados minuciosamente. Algúns remiten ao día a día das xentes do mar e outros propoñen interrogantes ou transforman a propia natureza, a partir do uso da porcelana, o ferro, a madeira e mesmo o ouro e o platino.

Mónica Maneiro guíanos pola última exposición do artista Suso Fandiño, ‘Historia dun tempo pasado‘, que pode visitarse na galería compostelá Patio de Luz. Unha colección de obxectos e imaxes articuladas en torno á idea de que pasado e futuro están interconectados de maneira cíclica. 

Mónica Maneiro comenta ‘Liquid Ground‘, a exposición da artista Enar de Dios Rodríguez que acolle a galería compostelá Nordés. Unha grande instalación na que os océanos son protagonistas a través de ilustracións dos seres que os habitan, das exploracións do fondo mariño realizadas no pasado, das visións do futuro e das representacións dixitais que se constrúen hoxe para os espazos submarinos.