Escoitamos con Tito Lesende unha das cancións do disco que Caamaño & Ameixeiras estrean este venres. ‘Quitar o aire’ é o segundo disco do dúo que forman a acordeonista Sabela Caamaño e mais a violinista Antía Ameixeiras. Un traballo conceptual producido polo Hevi que presentarán en directo o domingo 22 de outubro na Sala Capitol de Santiago.

Na selección de hoxe, outros dous discos novos, o ‘Hackney Diamonds’ de The Rolling Stones e Arcadia, da cantautora estadounidense Lily Kershaw. E ademais, recordamos o concerto especial que Dios ke te Crew darán en decembro para celebraren os seus “tremendos anos vinte”. 

Tito Lesende tráenos os primeiros petiscos de O.D.A., a nova canción de Guadi Galego, que se estrea este venres. Completamos o menú musical desta primeira semana de outono cun dueto da propia Guadi Galego con Pamela Rodríguez, artista peruana afincada na Coruña que acaba de publicar o EP ‘Meigas’. E soa tamén un dos temas de ‘Las ventanas de mi alma’, o último disco de Luz Casal, que actúa en Vigo o 6 e 7 de outubro. 

Tito Lesende comenta o novo disco de Grande Amore, un dos nomes imprescindibles da última música galega. Escoitamos tamén a Rodrigo Cuevas e a rapeira coruñesa Kyr4, que forman parte da programación do ciclo Noites do Porto, e unha das cancións do disco que publicará este mes Salvador Sobral.