Eva Mejuto tráenos a primeira entrega de contos de medo para o Samaín deste ano: Valentina nunca calas e o monstro da media cara (OQO), de Charo Pita e Marjorie Pourchet; Sete monstros e un gato (Kalandraka) de Rafa Ordóñez e Christian Inaraja; Gato montés (Triqueta) de Margarita del Mazo e Daniel Montero Galán e mais Censor de monstros (Barafunda) de Patricia Varela e David Bastos.
Eva Mejuto fálanos hoxe de tres libros galegos que forman parte da última edición da prestixiosa listaxe de literatura infantil e xuvenil ‘White Ravens’. Son ‘A lebre mecánica’ de Ledicia Costas (Xerais); o libro despregable ‘A nota’, de Pilar Serrano Burgos e Daniel Montero (Kalandraka) e mais o álbum ‘Peixe’ de Emilio Urberoaga e Javier Zabala (Bululú).
Eva Mejuto proponnos hoxe dúas lecturas que teñen que ver coa adolescencia. O poemario ‘Tempo de lagartos’, con versos de Carlos Negro e ilustracións de Raquel Senra, é unha reflexión sobre ese tempo vital de mudanza de pel dirixido sobre todo a pais e nais de adolescentes. Publícao a editorial Galaxia.
A segunda proposta de hoxe acaba de chegar ás librarías: ‘Furia’, de María Reimóndez, premio Jules Verne de Literatura Xuvenil e publicado por Edicións Xerais. Unha novela que combina as voces dunha rapaza de dezaseis anos e da súa tía avoa, a adulta que a coida trala morte de súa nai.
Eva Mejuto traénos hoxe o libro ‘Os camiños de Dorothé’, un libro-disco que achega o público infantil ao cancioneiro de Antón Santamarina e Dorothé Schubarth, a etnomusicológa suíza finada a comezos do mes de setembro á que tanto lle debe a nosa tradición oral. ‘Os camiños de Dorothé’, impulsado por Sonsoles Penadique, e con ilustracións de Rocío Fernández Paz, está editado por Mialma Producióis Creativas e viaxará polo país a través do espectáculo ‘Café Dorothé’.
A segunda proposta de hoxe é o álbum informativo ‘Pícache a curiosidade?´, no que María Canosa e Ro Ledesma contan de maneira amena e visual como se fai un libro, como voan os avións ou onde vai a auga dos baños. Edítao Cumio.
Hoxe Eva Mejuto proponnos ler biografías. Estrelas galegas da ciencia é unha historia de persoeiros e achados asombrosos, publicada por Hércules de Ediciones, con textos de Maite Vence, Manuel Vicente e Andres Burés e ilustrado por Clara Cerviño. A través do libro no que saberemos de figuras como Ángeles Alvariño, José Rodríguez ou María Wonemburger. Irene, a porteira é unha banda deseñada que conta unha a historia dunha pioneira galega do deporte, Irene González Basanta, futbolista que rompeu barreiras hai un século. O guión do cómic é do xornalista Óscar Losada e as ilustracións, de Xulia Pisón.
Eva Mejuto trae hoxe ao seu ‘Faro dos libros’ dúas lecturas que parten de realidades duras. ‘Terra de ninguén’ é un álbum ilustrado da xornalista María José Floriano con ilustracións de Federico Delicado sobre un poboado marxinal da Comunidade de Madrid. Unha voz infantil é a que nos relata en primeira persoa a vida entre a inocencia e o desencanto. Publícao Kalandraka. A segunda proposta de hoxe, xa para público adolescente, é ‘Regreso á illa de San Simón’, unha banda deseñada que recorda o pasado da illa como campo de concentración. Unha obra colectiva publicada en 2021 pola área de Memoria da Deputación de Pontevedra e realizada por alumnado e ex alumnado da escola O Garaxe Hermético de Pontevedra.
Eva Mejuto recoméndanos hoxe a lectura da ‘Triloxía de Corfú’, de Gerald Durrell, traducida ao galego por Susana Collazo e publicada por Sushi Books. Tres libros descacharrantes e luminosos sobre a experiencia do escritor e naturalista británico, que se trasladou coa súa familia a esta illa grega sendo un neno. Falamos tamén de ‘Ringo. Memorias dun coello fedello’, de Pablo Nogueira Campo, con ilustracións de David Pintor.