Presentamos unha das novísimas cancións de Paul McCartney, que tamén anunciou un recital en Barcelona en 2020. E centrámonos nalgunhas das citas musicais desta fin de semana: Kiko Veneno estreando o museo MEGA de Estrella Galicia como recinto de concertos (venres 29), as portuguesas Anarchicks regresando a Galicia para tocar en Compostela (venres 29) e Cangas (sábado 30) e os nosos clásicos Heredeiros da Crus enchendo a sala Capitol (sábado 30).

Viaxamos con Tito Lesende á feira Monkey Week de Sevilla e comentamos a presenza galega neste festival, con proxectos como Baiuca ou Blanco Palamera.

Lembramos, ademais, dúas citas importantes dos vindeiros días: os concertos do estadounidense Curtis Hanrding en Ferrol, e o das galegas Agoraphobia en Santiago de Compostela.

Os cántabros “Los Estanques”, os vigueses “Presumido” ou Guadi Galego, co seu novo traballo “Inmersión”, son algunhas das citas que dominan o panorama musical de Galicia nos vindeiros días.

Este xoves centrámonos na intensa actividade musical de pop e rock nos escenarios galegos. Comezando por Pardo, que presenta o seu disco “Santa Cruz” no Playa Club (A Coruña). Ademais, Xoel López pecha a súa xira e participa nun traballo de homenaxe ao “Mediterráneo” de Joan Manuel Serrat. Os lugueses Holywater seguen ofrecendo concertos en Vigo, A Coruña e Santiago de Compostela. E, por último, o grupo madrileño Morgan regresa esta fin de semana a Vilalba e Santiago de Compostela.

Tito Lesende fálanos da historia dos Pixies. Os de Boston estarán por primeira vez en Galicia: o sábado, ás 22:00, no Coliseum da Coruña. 

Os Maigos dos Músicos, Allah – Las, Agoraphobia e Guadi Galego protagonizan esta sección. 

Sés abre o San Froilán co repertorio de “Rabia ao silencio”, pero a programación das festas en Lugo ofrece moito máis. Pola súa banda, os cataláns Cala Vento, unha das propostas máis interesantes do pop independente estatal, fan estes días xira pola Coruña, Vigo e Ourense.Por último, lembramos a publicación do novo disco do grupo pontevedrés Bifannah, chamado “Danças líquidas”.

Este xoves dividimos a atención entre o pop actual e os clásicos internacionais. Primeiro parámonos na banda galega Moito!, que toca o venres 27 en Vigo, presentando “Ingeniería inversa” nun concerto compartido con Igloo. O sábado 28, o Campus de Esteiro en Ferrol acolle o festival Festeiro, no que toca, entre outros artistas, La Bien Querida, da que podemos anticipar un tema do seu inminente novo disco.

No eido internacional lembramos a importancia de Judas Priest, que vén de ser anunciado para o Resurrection Fest de Viveiro en 2020. E despedimos co clásico John Mayall, cuxa xira de 85º aniversario pasa pola Coruña e Pontevedra a vindeira semana.