Martes de entroido que non podería comezar mellor no cultural, porque temos a estrea do novo disco de Chicharrón. Chámase ‘Erosión’, é o seu quinto traballo, e chega menos dun ano despois do éxito de ‘Unha fogueira intacta’.

E máis temas, porque estivo por aquí Armando Requeixo coas suas lecturas, e hoxe falounos de ‘Tres en raia’ de Xosé Manuel Martínez Oca.

Recordamos no Diario Cultural a unha figura do humor e a cultura como foi Xesús Campos, Chichi. Escritor, debuxante, humorista e guionista da Televisión de Galicia. O seu fillo Nico presenta unha reedición das súas ‘Estampas do mundo elegante’, acompañadas dos textos de amigos, xornalistas e xente da cultura.

E despois, no tempo da música con Luis Miguel Crespo, queremos recordar a outra figura fundamental da composición galega, Andrés Gaos.

O 2 de marzo teremos oportunidade de ver na Television de Galicia a miniserie ‘Sofía Casanova, a obreira do pensamento’. Falamos coa directora, Zaza Ceballos, e a actriz protagonista, Isabel Naveira.

E máis temas, porque estará por aquí Rut Balvís, a nosa colaboradora de artes do movemento, para falarnos de varias convocatorias abertas de residencias artísticas.

Imos facer o camiño de Santiago, viaxar no tempo, e coñecer a historia antiga e medieval de Galicia, todo no mesmo lugar, no mesmo xogo. Falamos por suposto de The Waylanders, o proxecto titánico de Gato Studio, que lanzaron desde A Coruña o maior videoxogo galego. Xa se pode mercar e xogar, así que imos botar unha partida con Sergio Prieto, que é un dos creadores.

E despois, a carteleira con todas as películas que poderemos ver nos vindeiros días, e que nos comentará, coma sempre, Begoña Vázquez de Sala 5.

Hoxe temos unha estrea moi especial, porque neste 22 do 2 do 22 vén de saír o novo disco de Santi Araujo, ‘Suelta o Muerde’. Máis alá de todas estas dualidades, o disco é unha fermosura no musical, así que non podemos agardar máis a preguntarlle a Santi por el.

E despois, como cada martes, teremos por aquí a Armando Requeixo coas súas lecturas recomendadas. Hoxe, cunha interesante obra de tradución como é ‘Azami’, a novela da escritora de orixe xaponesa Aki Shimazaki.

Comezamos semana indo de exposición, e agora mesmo estase presentando na sede Afundacion da Coruña a mostra ‘Mirar de novo. A muller contra o tempo’. É unha exposición que puidemos ver durante a pandemia de maneira virtual e que agora comeza a itinerar polas diferentes cidades. Xa estivo en Santiago, agora na Coruña, e logo irá viaxando. Mirando de novo, o que pretenden é descubrir unha nova historia da arte, escrita, debuxada, e deseñada polas mulleres. Falaremos cun dos seus comisarios.

E logo temo por aquí a Alba Cid, que hoxe nos quere comentar o novo número, o 44, da revista Dorna, expresion poética galega.

Este mércores, o Diario Cultural non é alleo á traxedia do naufraxio do Villa de Pitanxo en Terra Nova. A cultura, e concretamente a fotografía, tamén nos pode axudar a falar das feridas abertas no mundo. A asimilar as que acontecen ao lado da nosa porta, e a coñecer as que suceden a milleiros de kilómetros. Hoxe conversamos con tres fotógrafos, Chema Conesa, José Cendón e Gervasio Sánchez, sobre o compromiso que o xornalismo debe manter sempre coa verdade e sobre todo coas persoas.

E na segunda parte do programa, teremos por aquí a Montse Pena Presas e as súas lecturas do mellor da literatura infantil e xuvenil. Desta vez, con ‘Chuvisca’, de Fernándo Pérez en Kalandraka, e ‘Capitán Lentella. Aventura a todo gas’, de Jorge Campos en Xerais.

Nas Xornadas Gálix “Poesía cargada de futuro para futuras xeracións” e coa música folk que nos trae Emilio Españadero.

Coa longametraxe documental “Xeración Perdida 36” e coa exposición María Casares, residente privilexiada.

Hoxe conxugamos fotografia e literatura coa celebración do ano novo chinés, porque ven Armando Requeixo a facernos a súa lectura persoal de ‘O ano do tigre’, o novo libro da editorial Rodolfo e Priscila. Un libro coral de relatos con tigres e tigresas como protagonistas.

Pero antes, a fotografía. Percorreremos co fotógrafo ferrolán Vari Caramés a retrospectiva que a Sala Canal Isabel II de Madrid lle adica polos máis de 40 anos de traxectoria.