O oitavo traballo do Cuarteto Quiroga, Premio Nacional de Música en 2018, é unha homenaxe ás posibilidades expresivas do cuarteto de corda e á arte da concentración musical. O disco inclúe obras para cuarteto de corda de Haydn, Beethoven e Bartók e unha peza de Gyrgy Kurtág que aínda non fora gravada.

Conversamos cun dos integrantes do Cuarteto Quiroga, o galego Cibrán Sierra, sobre este disco e a historia da formación, que deu o seu primeiro concerto en Leiro en 2003.

José Vázquez Cereijo foi pintor, coleccionista, gravador… Sobriño de Luís Pimentel, tamén fixo incursións na poesía. Logo do seu falecemento no 2016, Anne Nikitik, a súa viúva, propúxose recompilar toda a súa obra e froito deste traballo nace agora a Fundación VAC-AN (Vázquez Cereijo – Anne Nikitik). 

Laiovento publica en publica ‘A vontade de cambiar: homes, masculinidade e amor’, da feminista afroamericana bell hooks. Unha obra que debulla como o patriarcado oprime tamén os homes e busca modelos para unha masculinidade non patriarcal. Conversamos con Xosé Cabido, prologuista do libro e impulsor de obradoiros de igualdade específicos para adolescentes varóns. 

Marivi Ibarrola colleu a cámara nos anos 80 para retratar o nacemento e o desenvolvemento dun movemento de gran axitación cultural como foi a movida madrileña. Agora, a Casa Museo Casares Quiroga da Coruña recolle o testemuño visual desta época, pero dende un punto de vista galego. Ata o 4 de outubro pode visitarse a exposición fotográfica A invasión galega da movida madrileña nos ollos de Marivi Ibarrola. Conversamos coa fotógrafa e co comisario da mostra, Tomi Legido.