‘Síbaris’ é un texto teatral que Domingo Villar deixou rematado antes da súa temperá e inesperada morte en maio de 2022. A versión escénica estréase esta fin de semana en Vigo, dirixida por Lois Araúxo Blanco e interpretada por Carlos Blanco, Belén Constenla, Oswaldo Digón e Pablo Novoa. O protagonista da montaxe é Víctor Morel, un escritor célebre en crise creativa. 

O London Spanish Film Festival inaugura a sección ‘Letters from Galicia’, dedicada ao cine galego. É unha iniciativa promovida polo Galician Film Forum, un colectivo independente de galegos que promoven a difusión do noso audiovisual no Reino Unido. En colaboración coa Mostra Internacional de Cinema Etnográfico do Museo do Pobo Galego proxectan dous dos filmes premiados por este certame, ‘Al otro lado del mar’, de Eloy Domínguez Serén e mais ‘Tatuado nos ollos levamos o pouso’, de Diana Toucedo. Conversamos coa cineasta Adriana Páramo, unha das integrantes do Galician Film Forum. 

O poemario ‘Materia’, publicado por Edicións Xerais en 2023, é o cuarto Premio Nacional para a poesía galega, despois dos recibidos por Manuel Álvarez Torneiro, Pilar Pallarés e Olga Novo. O xurado destacou a “extraordinaria forza evocativa e sensorial” do libro e a súa exploración non compracente de temas como a familia e a maternidade. Conversamos coa poeta, que recibiu a noticia da concesión do premio desde o estado mexicano de Chiapas, onde participa nun festival de poesía. 

Conversamos con Henrique Alvarellos, o presidente da Asociación Galega de Editoras, sobre o presente e futuro da edición en Galicia. Debullamos as cifras dos últimos 40 anos con Manuel Bragado, un dos participantes no simposio ‘O libro e a lectura’, organizado pola AGE.