O Compostela Ilustrada estrea este ano “Edición Verán”, nunha versión un pouco máis reducida que en anos anteriores, dadas as circunstancias sanitarias, pero non por iso de menor interese.

Boa proba diso é o nivel e a traxectoria dos seis artistas que este ano participarán no Encontro, que de novo será dirixido por Maru Godas. Precisamente ela será a que imparta un dos obradoiros que se levan a cabo nesta Edición estival.

Alí estarán a ilustradora valenciana María Herreros, que realizará o tradicional mural en directo, charlará do seu traballo e dará un obradoiro de retrato; Catalina Rodríguez, que vén desde Asturias para ofrecer un obradoiro de como ilustrar ioga e para falar do seu último proxecto sobre os camiños; Luis Ruiz Padrón que aterrará desde Málaga para ensinarlles ós participantes a debuxar grandes arquitecturas, presentar os seus libros e contar o seu traballo no xornalismo ilustrado; a ourensá MeliMolita, gañadora do Premio Compostela Ilustrada do pasado ano, que ensinará a debuxar no Mercado de Abastos, e o colectivo de Bosquejeros, que presentará a súa experiencia durante o COVID realizando retratos da Residencia Volta do Castro de Santiago.

A XLII Mostra de Teatro de Galego arranca o domingo 9 deste mes de agosto, da man dos Festicultores Troupe. Jonathan Miranda, director da mostra e Concelleiro de Cultura adiantanos as novidades desta edición que se celebrará coas máximas medidas hixiénicas de seguridade. 

Falamos tamén con Emilio Oro, compoñente dos Festicultores que, este ano, celebran o seu 15º aniversario. 

Trátase de cinco autores naturais de Muros que levan realizando esta exposición como
grupo arredor de cinco anos, logo de que a asociación SORUM ,
onde expuñan cada ano e baixo o comisariado de Domingo Guerra, se
disolvese.

Son Carmen Senande, Erat París, Alejandro Senande, Amalia Costa e Pepa Sestayo e presentan propostas artísticas variadas: óleo, acrílico, dixital…

A mostra estará aberta todo o mes de agosto, con aforo limitado.

Chencho Pardo Valdés vén de inaugurar no Museo das Peregrinacións de Santiago de Compostela a súa exposición máis querida e persoal.

Viae ad limina Sancti Iacobié é unha mostra de dúas cartografías e de 42 debuxos da súa autoría recompilados ó longo da súa carreira.

Un proxecto vital que recolle a súa interpretación dos escenarios do Camiño de Santiago entre os séculos XIII e XVI e que poderá ser visitada até o 31 de outubro.

Falamos con María Xosé Bravo, presidenta da A.C. Alexandre Bóveda e coordinadora da mostra que acolle unha selección de imaxes do Arquivo Vidal de Laxe con mulleres como protagonistas e poemas de vintecatro autoras, coa que queren poñer o foco nas mulleres, retratadas no seu ámbito privado e laboral polos fotógrafos de Laxe e con voz propia asinando os textos cos que dialogan as imaxes. 

Instalada na Mariña da Coruña, permanecerá alí ata o 30 deste mes de agosto. 

O Filandón de Música do Caurel celebra a súa edición XXIII este domingo 9 de agosto a partir das seis da tarde, na que o convidado de honor será Xavier Díaz, ao que se lle fará entrega da Tésera do Caurel 2020; e que, ademais,  retransmitirase por streaming a través do canle de youtube XoseLoisFoxoLIVE. 

A XXIII edición do Filandón honrará a memoria de Manuela Álvarez Prieto, Argentina Rodríguez Prado, Lino Fernández Raposo e engaden o nome de Antonio Río Monteiro, coñecido como o Ribeiro de Louzarela, o último brindeiro da montaña. 

Unha edición na que X. Luis Foxo estreará O cantar da primavera, e o vigués Kike Estévez, autor do CD-libro O Ribeira de Louzarela, brindador da dentro, será o encargado de facer o brindo. 

Antonio Piñeiro, gañador do IV Premio Xosé Neira Vilas, vén falar connosco do seu premiado libro, Esca. Un relato “tenebroso” e con elementos simbólicos ambientado na ría de Arousa dos anos 20, concretamente no balneario da Toxa.

A terceira edición do Festival de Música Contemporánea da Coruña, RESIS, baixa o pano este ano abrindo as portas ás Poéticas Pendulares. Esta é unha exposición que reúne cinco pezas audiovisuais de diferentes artistas cuxo nexo común é a utilización do corpo, o espazo e o tempo como elementos da expresión artística. A través destes elementos establécese un diálogo entre a arte coreográfica e a poesía.

As pezas son Les grands fantômes, As Grandes Pantasmas, de Louise Narboni e Yoann Bourgeois; Figuras decorativas, de Verónica Vicente; Urna, de Xurxo Gómez-Chao; La vaca, la perra, la virgen, de Luz Arcas, e Vibración do tempo, de Gosia Trebacz.