Onte celebráronse os premios Martín Codax da Música Galega con moita música en directo no Pazo da Cultura de Pontevedra e retransmisión por streaming. 

Son moitos os galardoados nestes premios da música galega e non podíamos telos a todos no programa de hoxe, polo que traemos unha mostra dalgúns dos gañadores.

Comezamos coa Banda de Música de Merza, que estreou a categoría de Mellor Banda.

Falamos con Laura Lamontagne, da categoría de música urbana.

Tamén estivemos con Taller Atlántico Contemporáneo, da categoría de música clásica e contemporánea.

E por último, con High Paw, da categoría ska e mestizaxe. 

Os premios Antón Fraguas de artesanía recoñecen os traballos de dous artesáns con moita traxectoria: Frank Bushmann na categoría tradicional e Rodrigo Riveiro na categoría contemporánea.

O xoieiro Riveiro foi recoñecido polo seu proxecto “Ferraxe de prata”, cun escornabois elaborado con prata de lei, madeira e louza. Pola súa banda, ao ebanista Buschmann, de orixe alemá e afincado en Corcubión, foille recoñecida unha cadeira elaborada con castiñeiro galego. 

Martín VázqueZ Baño é o produtor executivo de EP Audiovisual, unha produtora galega que levará á gran pantalla as viñetas de ‘Subnormal: unha historia de acoso escolar’. 

A dura historia do xogador de baloncesto Iñaki Zubizarreta, vítima de acoso escolar na súa infancia, protagoniza o cómic de Miguel Porto e Fernando Llor, recén chegado ás librerías. 

Martín Vázquez, amigo dos autores, foi o primeiro en ler o guión do cómic e saber que alí había tamén unha historia para levar ao cine, con actores reais. Comezarán a rodar en 2022 con localizacións en Getxo (lugar de nacemento de Zubizarreta) e Galicia.