Inaugúrase na Sede Afundación da Coruña a mostra ‘Mirar de Novo. A muller contra o tempo’, unha exposición comisariada por Diego Gascón e David Barro que reúne 32 pezas realizadas por 30 artistas mulleres, entre a obra pertencente á colección ABANCA e Afundación e algunha cesión de museos coma o Thyssen ou o de Belas Artes de Asturias.
No título, nese ‘Mirar de novo’, temos unha resposta natural ao esquecemento que durante séculos sufriron as mulleres artistas na historia da arte e na historia en xeral. Unha historia que nos chegou contada a medias, a través da perspectiva masculina, pero que debemos recuperar mirando de novo. Elas tamén foron cronistas da súa época, elas contaron a historia, elas abriron camiños artísticos do mesmo xeito que os homes. Comezando no século XX, ‘Mirar de novo’ ofrécenos obras de artistas galegas como Maruja Mallo ou Elena Colmeiro, entre outras de renome e trascendencia nacional e internacional.
Os lucenses Arrythmia vén de publicar esta fin de semana pasada o seu novo traballo discográfico baixo o título de 1. O trío volve así á vida trala pandemia con moita forza, mensaxes contundentes e con toda a ansia de visibilizar os problemas actuais da sociedade dende os propiamente sociais ata os mentais. Calidade e etiquetaxe difícil, aínda que polo rego do metal, o novo disco dos Arrythmia xa está dispoñible en tódalas plataformas. Falamos con guitarrista e vocalista da banda, Alberto Busto.
Dicía Robert Capa que “a verdade é a mellor fotografía”. Unha frase e unha verdade que a maioría dos fotoxornalistas levan por bandeira cando percorren o mundo, cámara en man, contando as historias máis bonitas e as máis duras.
É o caso dos 40 fotoxornalistas que protagonizan a exposición ‘Creadores de conciencia’, que se inaugura esta tarde no Auditorio de Galicia en Santiago de Compostela, e que se poderá ver ata o 29 de maio na sala Isaac Díaz Pardo.
O comisario da mostra, o tamén fotógrafo e editor Chema Conesa, fíxose unha pregunta no momento de montar esta exposición: pode unha fotografía crear conciencia? Estendémoslle esa mesma pregunta a Conesa e aos fotógrafos Gervasio Sánchez e José Cendón.
Vari Caramés naceu en Ferrol en 1953, e comezou a tomar fotografías desde ben novo, totalmente autodidacta. A tomar fotos ou a debuxar a súa realidade cotiá co propósito de atopar nela lirismo e misterio. Sempre cunha mirada propia, evitando tendencias e modas e partindo do diario e familiar. Converteuse así nun referente da fotografía en España nos anos 80. Primeiro en branco e negro, logo incorporando a cor, pero nunca abandonando unha plasticidade e texturas que o achegaban máis á pintura que á fotografía, nesa busca de que as súas imaxes vivisen no presente eternamente.
O de Vari Caramés son 40 anos de vida dedicada á fotografía, que agora tratan de resumir na Sala Canal de Isabel II de Madrid coa expo ‘Algo, nada, sempre’. Tres palabras coas que as comisarias Blanca Berlín e Nerea Ubieto definen o traballo de Caramés. A mostra, a máis grande do fotógrafo, poderase ver ata o 24 de abril.