Chega ás salas de cine galegas ‘Malencolía’, a última película dirixida por Alfonso Zarauza e participada pola Televisión de Galicia.
Un filme protagonizado por Melania Cruz e Xulio Abonjo que mestura terror, comedia e a tradición oral galega.
Dous dos intérpretes do elenco, Iolanda Muíños e Diego Anido, acaban de ser recoñecidos con cadanseu premio Mestre Mateo polos seus papeis.
Malencolía pode verse en cines das sete principais cidades galegas e tamén en Vilagarcía, Narón, A Estrada, Viveiro, Caldas, Cee, Marín, Leiro, A Rúa e Ribadeo.

‘Non penses nun elefante rosa’ (Xerais) é a nova novela de Antía Yáñez. Liberada de prexuízos e a un ritmo vertixinoso, coñecemos a Aurora, unha protagonista transparente para o lector, pero totalmente opaca para a xente que a rodea. Obsesionada coa limpeza. Lectora de novela erótica. E pouco amiga dos nenos, aínda que logo se ten que enfrontar a un rapaz un tanto particular. Unha millenial por definición, cun trastorno obsesivo compulsivo.

A través deste elefante rosa confrontamos a saúde mental, o amor romántico, a cultura do esforzo, as expectativas e, en definitiva, o que é ser unha muller millenial que non pode deixar de pensar nun elefante rosa.

10 anos da morte de Alberto Gende. O pintor e deseñador de Carballo marchou demasiado cedo, con 40 anos, pero deixando máis de 25 de creación, inventiva e imaxinación. Chamámoslle pintor e deberiamos dicir artista, porque ata para a música tiña talento: Alberto participou como deseñador e inspirador para grupos da vila como Franc3s, xerme de Chicharrón.

Vituco Neira achegouse ata o Pazo da Cultura de Carballo, onde recordan a Alberto cunha mostra retrospectiva e un libro, ‘Alberto Gende. Encher o baleiro’, deseñados polos seus irmáns, Juan Félix e Xurxo Gende.

Estamos na véspera dun dos días máis emocionantes e esperados polo sector audiovisual galego, que é a celebración da gala dos Mestre Mateo. Á emoción de todos os anos súmaselle a celebración do vixésimo aniversario dos premios, e un sector que pouco a pouco comeza a saír da crise sanitaria.

20 anos: o 7 de xuño de 2003 celebrouse no Auditorio de Galicia de Santiago a primeira edición dos Mestre Mateo, que tivo como pelicula gañadora ‘Os luns ao sol’ de Fernando León de Aranoa. Unha gala organizada por unha recén nacida Academia Galega do Audiovisual con Ernesto Chao como presidente e Angel de la Cruz como vicepresidente, entre outros profesionais.

En todo caso, 20 anos hai que celebralos como merecen, por iso convidamos ao presidente da Academia Galega do Audiovisual, a Álvaro Pérez Becerra e ao primeiro vicepresidente que tivo a Academia, o director e guionista Ángel de la Cruz.