Unha guía de Europa para turistas lingüísticos. Iso se propón ser ‘Lingo’ (Rinoceronte), o libro do nerlandés Gaston Dorren. E nese camiño por Europa podemos chegar a coñecer desde as linguas e as historias máis curiosas e descoñecidas sobre o córnico ou o saami. Linguas que non sabías que existían: o gagauzo, o manx ou o normando do canal. E historias sobre o galego e o castelán nas que ao mellor non pensaramos antes.

Repasamos todas estas anécdotas lingüísticas con Moisés Barcia, tradutor ao galego de ‘Lingo’.

Abe Rábade visita o estudio do Diario Cultural para presentar o seu novo disco, ‘Botánica’. Se cadra o mellor lugar para facer esta entrevista sería no medio dun souto ou dunha carballeira. Neses lugares que Rábade describe como “máxicos e inspiradores”. En ‘Botánica’ as plantas son as protagonistas, xunto coa mestura musical do jazz e a música tradicional (personalizada en Davide Salvado e a súa pandeireta).

Un disco que xa se pode mercar, e que presentará en directo o sábado 24 ás 12h no Teatro Principal de Santiago.

‘O mundo e outras vésperas’ é o novo libro que a editorial Galaxia inclúe na súa Biblioteca Álvaro Cunqueiro, unha recompilación de artigos que o autor de Mondoñedo escribiu para o xornal vigués ‘El Pueblo Gallego entre 1932 e 1936. Un libro que edita Armando Requeixo.

O exercicio de escribir sempre foi un acto case mítico para os que non somos escritores. Temos esa imaxe da persoa pechada na súa habitación, en silencio e soidade, escribindo. Ou paseando, buscando inspiración no movemento, nas paisaxes. Seguramente sexa todo moito máis terreal, pero as películas contribúen a esa imaxe. E ao mellor non é de todo falsa.

Neste Diario Cultural falamos con Ana Cabaleiro (‘Deixádenos remar’, Xerais) e Cándido Paniagua (’48 horas’, Xerais), dous escritores que no mes de agosto estiveron en Xerusalén e Turquía respectivamente grazas a unhas residencias literarias. Como inflúe esta experiencia no libro final?