Paula Carballeira foi galardoada co premio Nacional de Literatura Dramática que concede o Ministerio de Cultura, pola obra ‘As alumnas’. O xurado valorou o texto como “un eloxio do maxisterio que ensina sobre a dúbida e o debate”. Conversamos coa escritora fenese sobre esta obra protagonizada por dúas ex alumnas de María Barbeito, a mestra republicana represaliada polo franquismo. ‘As alumnas’ está publicada na Editorial Galaxia e fora unha encarga da produtora Culturactiva, que a levou aos escenarios en 2022. 

Pío Barreiro conclúe as súas recomendacións estivais de banda deseñada con varios cómics que falan de fútbol e tamén da realidade social. Temporada de rosas, da francesa Chloé Wary, sobre unha adolescente que xoga ao fútbol; Una pequeña mentira, de Mario Torrecilla e Artur Laperla, sobre un neno que mente a seu pai alcólico dicíndolle que foi seleccionado polo Arsenal e mais Irene, a porteira, a BD de Xulia Pisón e Óscar Losada sobre a pioneira coruñesa do fútbol Irene González Basanta.

Asistimos ás audicións coas que o Centro Dramático Galego escolle os 20 intérpretes do espectáculo que estreará en 2024. Tamara Canosa será a directora da montaxe, que explorará o formato dos talent shows televisivos e formará parte da celebración do cuadraxésimo aniversario da compañía teatral pública.

O edificio Castelao do Museo de Pontevedra acolle dende o 3 de agosto esta mostra que pon en valor a obra de Meana, artista e profesor do Departamento de Pintura da Universidade de Vigo que falecía a comezos de ano. Residiu en Galicia dende 1993 e foi decano do centro entre 2010 e 2015. Conversamos con Alberto Ruiz de Samaniego, comisario desta exposición que reúne máis de 30 pezas do artista.

Carlos Crespo avánzanos en primicia outra das cancións que formarán parte do primeiro disco de Mondra e guíanos entre os primeiros festivais de setembro: Festival da poesía do Condado, Osa do Mar ou Meninas de Canido. 

A editorial Galaxia recupera ‘Un home que xaceu aquí’, a primeira novela do xornalista Aníbal C. Malvar, publicada orixinalmente por Sotelo Blanco en 1993. A intriga da desaparición dun mecanoscrito sérvelle ao escritor para denunciar silencios e mentiras do noso pasado e para retratar acidamente os ambientes culturais composteláns. Un home que xaceu aquí foi a primeira das catro novelas negras nas que Malvar retratou a Galicia dos 90 e abriu novos camiños para este xénero na nosa literatura.

A Fundación Rosalía de Castro e a Asociación Cultural Dorna da Arousa son as encargadas de poñer en marcha esta décima edición da Inchadiña Branca Vela. Será este sábado 2 de setembro cando máis de trinta embarcacións chegadas das diferentes rías galegas farán o percorrido polo Ulla e o Sar que remata no Espolón de Padrón. Todo para homenaxear a figura de Rosalía de Castro. Puidemos conversar con Anxo Angueira, presidente da Fundación Rosalía de Castro, e Héctor Suárez, director da Escola de Navegación Tradicional Dorna da Illa de Arousa.

Sole Felloza ponlle o ramo a este espazo que pasamos á barxoleta os martes do mes de agosto. Hoxe, con outra historia sobre a necesidade de combinar sabiamente o traballo e a folganza. 

A Cidade da Cultura acolle a décimo terceira edición do Encontro de Artistas Novos, un foro de diálogo e intercambio artístico entre creadores, este ano coa participación de nomes consagrados do ámbito da fotografía como Alberto García-Alix, Vari Caramés, Beatriz Ruibal e Estela de Castro. Escoitamos a catro dos artistas participantes e a Rafael Doctor, coordinador do Encontro. 

España é o país convidado nesta XIII Bienal de Artesanía de Cheongju que se celebra en Corea do Sur. Soul Matter é o nome da colección española que estará presente nese punto de encontro mundial do 1 de setembro ao 15 de outubro. Na proposta non falta representación da artesanía galega, que conta con pezas da cesteira Idoia Cuesta, da ceramista Marta Armada e da artesá especializada en escultura téxtil Mercedes Vicente. Conversamos con dúas delas, Idoia Cuesta e Marta Armada.