Un 28 de novembro de 1912 nacía na Coruña Eugenio Granell. Para conmemorar o acontecemento, a Fundación que leva o seu nome organiza diversas actividades.
Os actos comezan hoxe coa conferencia “Xoguetes: os talismáns da arte moderna”, a cargo do profesor Javier Arnaldo. Ademais, haberá unha xornada de portas abertas os días 28 e 29 de novembro.
O libro ‘Caderno de Momentos’ recolle a traxectoria vital e creativa do ilustrador Xosé Cobas. O seu talento deulle vida ás palabras de Neira Vilas en ‘Memorias dun neno labrego’ ou Manuel Rivas en ‘O último día de Terranova’. Así as letras transformáronse en cores nos libros, cadros, gravados e carteis do autor.
Neste Diario Cultural conversamos con Xosé Cobas sobre as súas creacións. Dende pequeno aprendeu a realizar unha lectura visual do mundo que lle rodea. Non soamente lía as imaxes que ofrece a natureza, senón que tamén observaba todos os elementos do seu entorno.
As cidades galegas, en concreto, A Coruña, xogaron un papel esencial na súa creación. “A luz atlántica que invade o noso país é única, e moi diferente á luz mediterránea”, sinala o ilustrador, que sempre conseguiu trasladar a maxia desa luz galega ao papel.
Nao presenta o seu novo e último disco, “Ata que o lume se apague”, co que pon fin á súa traxectoria musical. Trátase dunha obra composta por doce temas que traerá consigo unha xira que abrirá o 5 de decembro cun concerto na Sala Capitol de Compostela.
Falamos con Jasper, vocalista do grupo.
Explorar a cultura ao redor das máquinas de escribir é posible na nova exposición ‘Olivetti. A unidade na diversidade’, que se pode visitar en DIDAC ata o mes de xaneiro.
Neste Diario Cultural falamos coa súa comisaria María Ramos, unha experta no deseño de novas tipografías. “Olivetti é un símbolo de deseño, foi unha empresa adiantada ao seu tempo”, explica a comisaria.
As tipografías parten de deseños a man onde importa máis a parte artística que a técnica. Os bosquexos a pulso son necesarios para crear novas letras. O seguinte paso é trasladar ese deseño ao ordenador.
As tipografías dependen do uso que se fan delas porque o importante é que sexa un sistema que funcione en conxunto, formado por letras, números e tamén puntuación.
O escritor Gonzalo Hermo, que recibiu o XVI Premio de Poesía Afundación, ofrece un recital para o Diario Cultural.
Unha viaxe ao punk77 e máis alá. Atravesamos un portal no tempo que se abre a nós en Pontedeume. Queres vir? Pois… Bule!
Davide Salvado despídese de “Lobos” para centrarse no que será o seu novo espectáculo. Co concerto deste venres na Casa das Crechas, Davide, acompañado por Santi Cribeiro, Carlos Freire e Pablo Dalama, pon fin a unha xira que levou á banda por boa parte do estado, Canadá, Finlandia, Bélxica ou Portugal.
A Irmandade da Sanidade é unha asociación impulsora do uso do galego nas áreas sanitarias. Os seus membros, conscientes da desgaleguización que sofren espazos como os hospitais, loitan para que os profesionais do sector empreguen a lingua propia. Desta forma, os pacientes séntense máis acollidos ao ver que o persoal fala no seu propio idioma.
Esta fin de semana, a Irmandade da Sanidade homenaxea ao cineasta e boticario Chano Piñeiro polo seu compromiso coa lingua e a cultura do país. Neste Diario Cultural falamos sobre a vida e obra deste artista con Marilu Casal e Nando Casal. “A botica pode solucionar os problemas do corpo, pero a música é alegría para a alma”, asegura Nando Casal.
A cultura non é cousa de xente de letras, senón que é ‘cousa de todos’ aseguran dende a Irmandade. A unión entre arte e ciencia rompe con este prexuízo erróneo e recorda que a cultura tamén está presente nas ramas científicas.
As cantigas das mulleres que traballaban no mar reflicten as duras condicións laborais e visibilizan ás miles de mulleres que sacaron adiante o sector das conservas en Galicia. Este será o tema principal da xornada Café na Memoria que terá lugar este xoves día 22 no Museo do Pobo Galego.
As mulleres cantaban como unha forma de amenizar as longas e esgotadoras xornadas de traballo. Agora, as súas voces convértense nunha fonte histórica fundamental para coñecer o noso pasado.
Hoxe falamos neste ‘Diario Cultural’ con Xurxo Souto, impulsor deste proxecto de recuperación de músicas e cantos de traballo das mulleres do mar.
“Son as mulleres que fixeron país, as que desenvolveron a economía da costa”, explica no noso espazo de cultura.
‘Cándido e os demais’ recibe o XI Premio Internacional Compostela de Álbums Ilustrados. Un galardón que convoca o departamento de Educación do Concello de Santiago e Kalandraka Editora, que nesta edición se lle entrega á obra de Fran Pintadera e Christian Inaraja. Un libro ilustrado que fala sobre o tratamento da diversidade e da diferenza. Falamos cos autores da obra.