A editorial galega Hugin e Munin achega libros de diferentes épocas e lugares aos lectores galegos. A peste, de Albert Camus, xa está traducida ao galego da man de Isabel Soto e Xavier Senín.

“Este libro ten diferentes lecturas, en función da idade do lector”, explica o director da editorial, Alejandro Tobar.

Esta nova editorial, que tamén é un club de lectura, nace co obxectivo de “incrementar a literatura traducida ao galego”, segundo asegura o seu director. Así xorde no 2011, en plena crise económica, unha iniciativa arriscada que apostaba pola cultura do país.

Outra das obras publicadas é a novela Apropiación indebida, de Lena Andersson, unha obra supervendas en Suecia.

“No momento de traducir, os pensamentos e sentimentos son universais”, explica a súa tradutora, Marta Dahlgren.

Os libros son o mellor agasallo para a noite de Reis. Neste espazo cultural falamos con escritores galegos que, ademais, foron os protagonistas da literatura infantil e xuvenil durante o ano 2018. Eles son An Alfaya, Carlos Negro e Antía Yáñez.

An Alfaya gañou o Premio Raíña Lupa da Deputación da Coruña coa novela ‘O grupo’. Ademais, a obra ‘O home de negro’ é a súa publicación máis recente. “É unha novela sensorial e onírica que crea un mundo imaxinario onde as cores e o xogo lúdico son os protagonistas”, explica a escritora nas ondas da Radio Galega.

O poeta Carlos Negro acaba de gañar o premio Jules Verne por ‘Aplicación instantánea’. “Unha obra que fala dos tempos actuais onde a praza pública da xuventude está nas redes sociais”, asegura.

Neste faladoiro tamén contamos con Antía Yáñez, que no 2018 conseguiu o premio Fina Casalderrey de literatura infantil pola igualdade coa obra ‘A reconquista’. “Comecei esta obra despois de ler unha noticia sobre uns profesores que dividían o patio do colexio entre os que xogaban ao fútbol e os que non. Recordei que era certo”.

Libros para soñar na noite máis máxica do ano.

As escritoras e investigadoras Chis Oliveira e Amada Traba publican o libro ‘Ám@me’, unha obra que cuestiona o concepto de amar e como aprendemos a amar na sociedade actual. Un gran número de producións culturais están protagonizadas polo amor e o ser humano tenta imitar aquilo que observa ao seu redor. Como aprendemos a amar?

A Editorial Galaxia vén de publicar unha colección sobre feminismo, entre a que se atopa esta obra. Nas súas páxinas, un gran número de cuestións sobre os mitos do amor romántico, a sexualidade, o amor nas redes e as relacións na xuventude.

As escritoras explican que, aínda que non nos decatemos, o amor é o sustento da organización social, relacionado coa política, o poder e a economía. Ao mesmo tempo, crea a expectativa de “atopar unha parella perfecta coa que compartir toda a vida”. Entón, que é o amor en realidade e que podemos esperar del?

Chis Oliveira e Amada Traba móstranse optimistas ante unha sociedade “disposta a revisar todo o aprendido e facer cambios”. Neste contexto, o seu libro xoga un papel fundamental. En definitiva, un libro para aprender a amar de novo, pero mellor.

O Pórtico da Gloria volve abrir as súas portas despois dunha década de restauración e estudo. Meses e anos de moito traballo para frear o deterioro do paso do tempo. O resultado é unha xoia que recupera a policromía da obra de Mestre Mateo e, por tanto, o seu valor máis auténtico.

Dende hoxe, os visitantes poden desfrutar de visitas guiadas, máis longas e de pago porque “agora son visitas con valor engadido, cun carácter diferente”, explica Daniel Lorenzo, director da Fundación Catedral.

Neste espazo cultural falamos co experto en proxectos artísticos, Francisco Prado Vilar. “Foi curioso decatarse de que coñeciamos o Pórtico dende lonxe e coas cores apagadas”, explica. Neste proceso de recuperación da obra, os mesmos investigadores aseguran que descubriron moitas cousas que lles sorprenderon, así como máis datos sobre quen era o gran Mestre Mateo.

Volven os contos clásicos, pero esta vez con música e baile. Luis Vallecido publica ‘Cantamos’, un libro-disco no que podemos escoitar as historias de sempre dunha forma diferente. Esta obra chega da man dunha nova editorial, Guindastre. Nas ondas da Radia Picariña, a emisora infantil da Radio Galega, xa podemos escoitar estas auténticas obras de arte.

“Teño unha débeda importante co público galego”, conta este músico madrileño, ao que engade: “este disco é unha forma de devolverlle a Galicia todo o agarimo que sempre me deu”. Un libro creado co amor á terra e á cultura galega.

Neste espazo cultural tamén recibimos a visita de Celtia Figueiras, autora dos textos de ‘Cantamos’. A obra inclúe uns elementos moi anovadores: os pictogramas. Así nace un libro inclusivo, que facilita o acceso para os máis pequenos da casa. “Non somos concientes do importante que son os pictogramas para facilitar a lectura das persoas con autismo”, explican os dous artistas.

Bailar é unha forma de transmitir a nosa cultura e coidala para o futuro. Cando queremos conservar as palabras, podemos escribilas. E, para non esquecer as melodías, temos as partituras. Pero, como gardamos os bailes?

A solución son os ‘bailegramas’, que chegan da man do músico Serxio Cobos. “Cando era pequeno decateime da necesidade de escribir o que aprendía no baile”, conta o autor.

A escritora Luisa Castro presenta o poemario ‘Actores vestidos de calle’, publicado pola Editorial Visor. Esta obra chega nove anos despois do seu último libro, un tempo que aproveitou para “reflexionar e ler porque ás veces, a nivel literario, o tempo e a vida piden parar”

Neste tempo, Luisa Castro desenvolveu o seu traballo como directora do Instituto Cervantes, onde descubriu a importancia do traballo colaborativo. Agora volve cunha poesía renovada, froito do diálogo e de reflexión persoal. “Hai tanto sobre o que escribir. Todas as cousas do día son motivo de escritura”, conta a poeta.

O poemario ‘Actores vestidos de calle” fala da soidade do escritor e do que hai no interior de cada persoa. Como é o tempo de silencio cando un escritor deixa de escribir? Que hai detrás de nós cando nos quitamos a máscara?