A productora executiva de Zenit acompáñanos dende Berlin nesta nova edición do Diario Cultural para falar da película de Isabel Coixet “Elisa e Marcela” que se proxecta hoxe na Berlinale.
O filme narra a historia de dúas mulleres galegas que se coñecen e namoran na escola onde traballan. A través da paisaxe de Galicia poderemonos achegar ata o primeiro matrimonio de mulleres en España a comezos do século XX.
A Radio Galega celebra o Día Mundial da Radio con Medio Bolo, unha aposta pola música a través dos concertos de curta duración coa fusión de tradicional e electrónico de Baiuca e Aliboria. Explicanolo todo a coordinadora deste proxecto Xiana Arias
Escoitámolo nas películas, na ficción e nas bandas sonoras. Pode que unha parte dos oíntes non se decaten, pero hai quen fica abraiado e pregúntase: que instrumento é ese? Así foi como Paulo Pascual Castro descubriu o theremín.
“É unha especie de caixiña con dúas antenas, que funcionan con dous campos electromagnéticos. Imos movendo a man e modulando o son”, explica o músico galego.
Paulo Pascual é o primeiro thereminista de Galicia en gravar un disco con este instrumento como protagonista. Este sábado podémolo ver en directo na Iguana de Vigo.
Carlos Tejerizo é o coordinador dun equipo de investigadores que acaba de descubrir en Casaio, na localidade ourensán de Carballeda de Valdeorras, o maior conxunto de pintura esquemática prehistórica en Galicia.
Neste espazo cultural falamos de banda deseñada cun dos máximos referentes do país: Kiko da Silva. O segundo número da revista ‘A viñeta de Schrödinger’ chega ás librerías.
“Necesitamos que as administracións públicas apoien estes proxectos. Cara onde vai un país que non aprecia a súa cultura?”, pregúntase Kiko da Silva.
A revista é unha fiestra aberta a todo o que se está facendo no mundo da banda deseñada, conta o ilustrador.
Kiko da Silva explica nas ondas da Radio Galega que o obxectivo na actualidade é chegar a todos os públicos. “Que un neno poda ler unha revista de banda deseñada xunto a súa avoa e o seu pai”, asegura.
“Un país que non le é un país sen cultura, sen futuro”, engade.
Viaxamos ata Ribeira para descubrir o segundo albúm en solitario de Javi Maneiro. “Acaricia mis arrugas” é o título dun disco no que maneiro se alonxa da estética, musicalidade e letras dos seus traballos en Jabón Blue ou en Heredeiros da Crus.
O profesor Antón Cortizas recolle no libro Non trabes na lingua, da Editorial Galaxia, unha escolma de trabalinguas da tradición oral galega e outros creados polo alumnado dun colexio mugardés.
Xogando coas palabras conseguiron inventar trabalinguas dende cero, crear novos a partir dos existentes e recoller os propios da tradición galega.
O obxectivo é dar valor á cultura galega mediante o xogo coas palabras, coa música, a lingua e os dobre sentidos.
No contexto actual no que a cultura lúdica non está tan presente na xeracións máis mozas é esencial recuperar o xogo infantil. Os trabalinguas son unha forma perfecta de conectar cos máis pequenos a través da lingua e a diversión.
O lugar que non hai. Recital de Estevo Creus.
Mozas á fronte #1 Catro voces da música hoxe arredor de Bikini Kill na volta aos escenarios da banda referente do movemento riot-grrrl.
O codirector da Sala Teatro Ensalle de Vigo, Pedro Fresneda, fala para o Diario Cultural do Festival de danza e teatro Isto Ferve.