Hoxe temos Diario cultural dende a Feira do Cocido de Lalín. Música, letras e fotografía son os protagonistas deste especial.

O cartel das festas é unha moza cunha cestola na cachola. Trátase dunha creación de Miguel Peralta e Xoana Almar, membros da cooperativa Cestola na Cachola, con sede en Lalín.

Nesta viaxe a Lalín tamén conversamos con Celso Fernández Sanmartín, autor do libro A cama do meu avó Manuel Sanmartín Méndez, na editorial Apiario.

“Estamos na primeira vez na historia da humanidade en que as xeracións máis lonxevas teñen pouco que ver na educación das xeracións máis novas, non son un referente”, afirma o autor.

O vindeiro 2 de marzo celébranse os Premios Mestre Mateo, a gran gala do audiovisual galego. A actriz Mela Casal recibirá o Premio de Honra Fernando Rey pola súa gran traxectoria no mundo do teatro, o cine e a televisión.

Mela Casal é o rostro e a alma de mulleres como Celia Rey, a alcaldesa en Portozás en Mareas Vivas; Sofía, unha das viúvas do mar en A vida por diante; Socorrito, no programa do Luar; ou a nai de Sito Miñanco en Fariña.

“Estou encantada, é un recoñecemento que nin nos mellores soños esperas”, conta nas ondas da Radio Galega.

Mela Casal é unha das persoas que máis loitou polo noso audiovisual dende hai máis de trinta anos. A cultura galega non sería o mesmo sen ela.

Neste espazo cultural facemos unha viaxe polo amor a través de once películas que vai proxectar o Centro Galego de Artes da Imaxe no ciclo Tan poderoso como o amor.

O nome do ciclo é o título dun ensaio de César Antonio Molina, quen tamén foi ministro de Cultura e director do Instituto Cervantes.

“Para a xente da miña xeración, dos anos finais do franquismo, o cine era como unha liberación”, explica o escritor.

A películas de amor de cada época representan a forma de amar característica de cada momento, aínda que “despois de 3.000 anos escribindo e facendo cine sobre o amor, non cambia a idea do amor como algo que pode chegar a ser máis poderoso que a morte”, indica o autor.

Outras das cuestións sobre as que reflexiona o escritor na súa obra é a cuestión do amor imposible, ademais da posibilidade futura de chegar a crear fórmulas matemáticas para entender este fenómeno.

Este martes día 19 é a inauguración do ciclo coa proxección do filme A serea do Mississippi.

No 2009, o grupo Novedades Carminha presentaba o seu primeiro disco, un traballo cheo de cancións directas e irónicas. Agora, dez anos máis tarde, publican o disco Ultraligero.

“A única forma de que un grupo dure máis de dez anos é levantarse cada día con ganas de facer cousas novas”, conta Carlos Pereiro.

O sábado 9 de marzo actuarán na Sala Capitol de Santiago, un concerto que xa ten as entradas esgotadas.

O libro ‘Se isto é un home’, de Primo Levi, chega ás librerías traducido ao galego por Xoán Manuel Garrido Vilariño na Editorial Xerais.

Esta obra é o testemuño dunha persoa supervivente de Auschwitz e intenta afondar na condición humana. Como prende en nós a semente da intolerancia ata chegar a extremos como o exterminio?

Como foi humanamente posible o Holocausto nazi? E, máis concretamente: será posible de novo?

“Cando os discursos deshumanizadores conseguen arrastrar ás persoas comúns, aí esta o problema”, explica o tradutor Xoán Manuel Garrido Vilariño.