Neste Diario cultural volvemos ás orixes para descubrir o oficio da cestería. Inaugúrase a mostra de artesanía Pensar coas mans. Cestería, cerámica e xoiería de Galicia, na Cidade da Cultura.

Un oficio descoñecido para as xeracións máis novas, que medran lonxe do traballo coas mans. Os artesáns, preocupados polo esquecemento da súa técnica co paso do tempo, recordan que non é un traballo que se poida aprender de forma teórica, senón que é preciso mergullarse e facer “unha carreira de fondo”.

Nun momento en que as máquinas se converten nas protagonistas do proceso produtivo, os obxectos perden a súa alma. A busca da autencidade, dos oficios ligados á cultura do lugar e a posta en valor do propio son os factores que están motivando o rexurdimento da artesanía.

Onde remata a artesanía e comeza a arte? Falamos disto con Verónica Santos, comisaria da exposición; e coa ourive Susi Gesto.

Neste Diario cultural escoitamos os sons dos órganos agochados nas igrexas da nosa terra. Comeza a cuarta edición do ciclo Músicas e outras paisaxes de Compostela, que durará ata a Semana Santa. Este programa ten como obxectivo afondar no imaxinario sonoro de Santiago e coñecer a riqueza instrumental da cidade, pero tamén descubrir outras culturas.

“En Galicia temos moitísimas igrexas e un gran patrimonio relixioso, pero onde están os órganos?”. Esta foi a pregunta que formulou a directora artística Belén Bermejo antes de comezar a súa investigación.

Tamén falamos con Andrés Díaz, comisario da mostra sobre o órgano nos fondos da Biblioteca Xeral, e coa organista Erea Blanco.

Pontevedra convértese na cidade da poesía e acolle o festival de PontePoética. Neste Diario cultural escoitamos a Yolanda Castaño, directora deste evento. Tamén falamos coas poetisas Isabel Ramos e Silvia Penas. Que significa para ti a poesía?

“Poeta é unha persoa que traballa coa palabra e na palabra, para dotala de máis usos e de máis significados”, di Yolanda Castaño.

Un lugar de encontro entre diferentes culturas, onde poetas de diferentes lugares e linguas comparten unha linguaxe común: a poesía.

Escoitamos música contemporánea a través da sétima edición do ciclo MIHLSons XXI. Este martes temos concerto no Museo Interactivo da Historia de Lugo. O sábado tamén podemos asistir a un espectáculo de música e danza contemporánea no Vello Cárcere.

Os protagonistas son o compositor portugués Luís Antunes Pena e o galego Jacobo Gaspar Grandal. Concertos, conferencias e clases maxistrais de percusión converterán Lugo no centro da música contemporánea durante o mes de abril.

Jacobo Gaspar ensínanos a facer unha escoita aberta dos instrumentos, coma quen “escoita os sons da natureza”, cheos de matices e cambios.

Tamén falamos do papel das orquestras como as encargadas de garantir a existencia dun repertorio sinfónico propio. Trátase dunha responsabilidade fundamental en Galicia, xa que non contabamos con rexistros do nosas composicións, explica o músico Jacobo Gaspar.

O compositor fálanos da tensión entre a cultura de masas e as formas máis minoritarias nunha realidade en que a música sempre queda nun segundo plano respecto a outras formas artísticas.

Silvia Penide presenta na Radio Galega o seu sétimo disco, ‘El efecto boomerang’. Falamos con ela da súa traxectoria profesional, un longo camiño que a levou a ser un dos referentes da nosa música. Un disco que fala das despedidas, dos momentos en que temos que dicir adeus de forma forzada para seguir adiante.

“O éxito é algo que vives no teu día a día, sentirte realizada e ver que tes traballo. O importante é non perder nunca a ilusión”, conta a música.

As letras de Silvia Penide convértense en voces que gritan verdade. Unha artista que transmite emocións e experiencias reais con cada unha das súas cancións.

Escoitamos o novo disco de Familia Caamagno.