Leilía presenta o seu espectáculo ‘CantarElas’ para celebrar o seus 30 anos sobre os escenarios. A música das pandeiretas e as voces das mulleres serán as protagonistas deste novo proxecto.

Nunha época na que parte da cultura galega estaba esquecida apareceron seis rapazas co traxe traidicional e unhas pandeiretas. Ata entón, a gaita era o único instrumento asociado á nosa cultura, pero cunha mirada ao pasado descubrimos que a música tradicional do país chega moito máis alá.

“Ser pandeireteira é ser muller galega”, contan as integrantes de Leilía, que sempre loitaron por visibilizar o papel das mulleres na música de raíz e na vida en xeral.

A Editorial Xerais publica un dos álbums clásicos de Uderzo & Goscinny, ‘Astérix en Britania’. Temos un total de catorce álbums publicados na nosa lingua. Neste Diario Cultural falamos cos tradutores, Xavier Senín e Isabel Soto.

Xavier Senín recorda o momento en que descubriu os libros de Astérix. Era xullo do 1976 cando viaxou a Francia para preparar as súas oposicións de francés. Na habitación en que durmiu había unha colección completa de Astérix. Dende ese momento non puido parar de ler.

Miguel Anxo Seixas publica ‘Castelao. Construtor da nación. Tomo 1. 1886 – 1930′ na Editorial Galaxia. É o primeiro volume da biografía de Castelao realizada tras un traballo de investigación de 20 anos.

“A grandeza de Castelao e Rosalía está na valentía para facerlle fronte a un mundo adverso e en castelán. Un rapaz a quen lle pegaban por falar galego, pero que nunca deixou de loitar pola nosa lingua”, conta Seixas.

Castelao empregou o seu talento para representar os problemas do seu pobo e poñer en valor a súa lingua.

A escritora Arantza Portabales publica a novela ‘Beleza Vermella’. Como atopar a arte nun feito tráxico?

A obra comeza cun asasinato e seis sospeitosos. O crime de Xiana Alén espertará as tensións e os segredos máis escuros da familia. “Todo o mundo ten algo que esconder”, asegura a escritora.

A biblioteca da Cidade da Cultura, o Ensanche de Santiago ou Cacheiras serán os escenarios polos que o lector viaxará a través das páxinas desta novela negra. “A natureza humana ás veces é horrible, o terror pode estar preto da túa casa”, di Arantza.

“Escribir esta novela baleiroume moito por dentro”, explica a escritora. A firma de libros comezará o próximo mércores na libraría Cronopios de Compostela.

A web do ‘Diario cultural’ da Radio Galega, diariocultural.gal, consegue o Premio Martín Códax ao mellor espazo de comunicación. A gala tivo lugar este mércores no Pazo da Cultura de Pontevedra.

Neste espazo cultural falamos con algúns dos músicos premiados como Su Garrido Pombo, Álex Guillán, de Baiuca, e Marcos Teira.

Su Garrido Pombo destacou o papel da Radio Galega con iniciativas como ‘Medio Bolo’: “Pareceume marabilloso participar nun dos programas, que as artistas poidamos participar con actuacións sen cortes na radio en internet é fantástico”.

Marcos Teira tamén celebrou a iniciativa de Notas de Jazz de emitir concertos por Internet. “Ese programa fíxose con moito cariño. É fundamental este tipo de proxectos multimedia”.

A música forma parte do noso día a día, escoitámola na casa, no traballo, na rúa… Pero, sabemos entendela?

A Orquesta Vigo 430 organiza o ciclo Escoitantes para aprender a escoitar a música. Neste Diario cultural falamos con Cándido Cabaleiro Paz, profesor superior de piano e mestre de Educación Musical.

As xornadas de preparación rematarán co concerto da Orquestra Vigo 430. A formación interpretará a Sinfonía 6 Patética de Tchaikovsky no Teatro Afundación de Vigo o próximo 1 de xuño, ás 20.30 horas.