O grupo Ruxe Ruxe presenta o disco O estraño falar dun monstro da aldea. O concerto será este venres, día 14, na Sala Capitol de Compostela.

O grupo Monoulius DOP presenta o seu novo disco o vindeiro sábado, 15 de febreiro, na Sala Capitol de Compostela. No Diario cultural tivemos connosco a Ula.

Tamén falamos do grupo Broa, que está preparando o seu primeiro disco. Entre os temas que van publicar, escoitamos Sairá o sol.

A Real Filharmonía de Galicia e o cuarteto Quiroga ofrecen tres concertos galegos esta semana baixo o título Xogando con Beethoven. O xoves 13, no Auditorio de Galicia; o venres 14, no Teatro Afundación de Vigo, e o sábado 15, no Palacio da Ópera da Coruña.

No Diario cultural entrevistamos a Cibrán Sierra (violinista) e a Josep Puchades(viola).

Falamos de rock and roll cos rapaces de Arapa-Xoe e coñecemos as candidatas aos Premios Mestre Mateo deste ano.

Pilar Pereira naceu no 1937 e debutou no teatro aos dez anos coa obra Contos de Nadal de Dickens. Dende aí, iniciou unha exitosa carreira profesional que acadou o seu máximo recoñecemento con A sonata dos espectros, ás ordes de Edwar Fuller. A crítica especializada calificouna como unha actriz polivalente cun enorme talento para os papeis dramáticos e como referente en infinidade de producións teatrais.

Falamos tamén de Arima, a película de Jaione Camoborda que hoxe chega aos cines.

Capitán Breomán é unha webserie de humor negro e absurdo que xa está dispoñible En Internet. Conversamos con Carlos Dorado Gayo, creador da serie, e con Helios Bouzón Carro, animador.

Falamos daquelas series feitas en Galicia, para plataformas internacionais, que se atopan en plena rodaxe ou a piques de comezar. Entre elas, 3 Camiños e Hierro. 

O cineasta José Luis Cuerda (Albacete, 1947) faleceu este martes en Madrid aos 72 anos de idade. Director, guionista e produtor, converteuse nunha das figuras máis relevantes das últimas décadas do cinema español. É coñecido por A lingua das bolboretas (adaptación da novela de Manuel Rivas) ou por Amanece que no es poco –que xunto con Total e Así en el cielo como en la tierra inaugura a triloxía do surrealismo. Co seu O bosque animado (adaptación da novela homónima de Wenceslao Fernández Flórez) fíxose co Goya á mellor película en 1987.

Lembramos a súa figura co actor Tamar Novas e co historiador cinematográfico Miguelanxo Fernández.