A VIII Xornada de Onomástica aborda a importancia dos nomes de lugar e de persoa na nosa literatura popular. Conversamos con Luz Méndez, unha das coordinadoras do encontro, e coa antropóloga Elena Freire Paz, que será unha das relatoras desta edición. O Seminario de Onomástica da Real Academia Galega organiza a Xornada, que se desenvolverá no Museo de Pontevedra o sábado 21 de outubro. O encontro poderá seguirse tamén a través da web academia.gal

Chega a librarías a versión estendida de “Ultraluz” escrita por Ledicia Costas e editada por Edicións Xerais. Galardonada co Premio Afundación de Poesía, o 20 de outubro chega tamén aos escenarios na Cidade da Cultura, coa música de Amaro Ferreiro e Sergio M. Puga.

Zeltia Acuña e Migui Carballido forman Zeltia Irevire con Cibrán Seixo. Despois duns cantos anos tocando en todo tipo de escenarios o grupo publica o seu primeiro álbum, ‘Vacaloura’, que recolle o seu repertorio acústico pero amosa tamén a curiosidade por outros sons. Un disco sintonizado coa natureza, poboado por lobas, cervos, o espírito do bosque e o vento nordés.

Falamos con Tareixa Novo (Fuxan os Ventos) e Pepe Ferreirós (Milladoiro) sobre o esperado alalá “Barqueiros de Ribadavia.

A undécima edición do Festival de Creación Musical Contemporánea impulsado polo colectivo Vertixe Sonora desenvólvese ata o 19 de novembro. Concertos, relatorios e charlas en Vigo, Santiago e Pontevedra das que falamos co director artístico de Vertixe 11, Pablo Coello, e cun dos programadores, David Durán. Unha das estreas que ofrece o festival é a ópera ‘Un riso para chorar’, do portugués Miguel Azguime, que chegará á Cidade da Cultura o domingo 29 de outubro. 

No transcurso do festival presentarase o repositorio ‘Vertixe Dixital’, que recollerá os 12 anos de traballo de Vertixe Sonora.

Arranca o VI INTERSECCIÓN – Festival Internacional de Cine da Coruña. As propostas, cun forte compoñente artístico, poden visitarse do 17 ao 22 de outubro. Falamos co seu director, Gonzalo E. Veloso.

No Día das Escritoras falamos da escrita como ferramenta de expresión, comunicación, sororidade e autocoidado. Conversamos coa matrona Marta Conde e a docente Eva Teixeiro, que forman parte do colectivo ‘Comadres das Letras’, un grupo de mulleres que escriben que xa publicou o volume ‘Contármonos’.

O Museo do Pobo Galego exhibe ata o vindeiro 4 de novembro as fotografías gañadoras e as finalistas do 17º Premio Luís Ksado de Creación Fotográfica, convocado pola Área de Cultura da Deputación da Coruña. Falamos con Fuco Reyes, gañador coa súa serie “O espello de Claude”; e co comisario do certame, Xurxo Lobato.

Unha historia arredor da discriminación e o acoso escolar. Redrum Teatro estrea hoxe no Festival Internacional Outono de Teatro de Carballo a obra “O pequeno poni”, dirixida por Paco Becerra e protagonizada por Laura Míguez e Guillermo Carbajo.

O FITO pon o acento nas compañías emerxentes. Dezaseis propostas escénicas na décimo-sexta edición do Festival Internacional de Teatro de Ourense. Entre os días 12 ao 22 de outubro, terá como escenarios principais o  Teatro Principal, as rúas da Cidade e o Liceo Recreo Ourensán.