O guionista Óscar Cruz visita ó estudo do Diario Cultural para falarnos de “A arte de ser un mal pai”, unha serie en lingua galega que se estrea en Filmin grazas á selección oficial no Festival Serielizados de Barcelona e Madrid.

Última oportunidade para asistir ó V Festival Ateneo Barroco. Remata hoxe co concerto “Biber, as Sonatas do Rosario”, interpretado por Lina Tur Bonet e o seu conxunto Música Achemica. Falamos co responsable da dirección artística do festival, José Víctor Carou.

Conversamos co editor Xosé Manuel Soutullo, que acaba de asumir a dirección xeral da editorial Galaxia, vacante trala dimisión de Francisco Castro o 18 de setembro. Soutullo estivo vinculado profesionalmente á editora durante máis de 40 anos, nos que asumiu diferentes cargos, e quere ser un director xeral “de equipos”. Sinala como primeiro grande obxectivo da súa xeira na dirección xeral o 75 aniversario da editora, no ano 2025.

“Queremos trasladar unha visión obxectiva do que acontece en Palestina”. Este luns arrancou a Semana de Cine Euroárabe Amal 2023 co foco no conflito entre Israel e Hamás. No Teatro Principal de Compostela. Falamos co director Ghaleb Jaber.

A mostra agrupa a artistas ‘millenial’ de Galicia e do norte de Portugal para explorar como a “ansiedade climática” está a calar nas súas investigacións. Falamos con Sergio Meijide, un dos comisarios da exposición.

Santiago de Compostela acolle durante toda a semana a segunda edición do festival de poesía nova ‘Luz Poética’, que integra recitais, presentacións, coloquios e, sobre todo, formatos popularizados nos últimos anos como slams, micros abertos e impros. Debullamos a programación con Yamini Prabhu Barretto, que participará recitando poesía en galego e hindi, e conversamos sobre a potencia da palabra falada con Lúa Mosquetera, unha das poetas participantes no recital que pechará ‘Luz Poética’ o domingo 29 de outubro no Teatro Principal. 

Nunha histórica xuntanza celebrada o 12 de outubro de 1923 en Ortoño acordouse a creación do Seminario de Estudos Galegos no que axiña se integraron moitos dos intelectuais galeguistas que se movían arredor da revista Nós. Agora,  entre os actos da celeración do centenario, unha exposición achéganos unha perspectiva diferente daquela institución cultural.

As actrices Paula Chaves e Estíbaliz Espinosa son dúas das protagonistas da película ‘O home e o can’, dirixida por Ángel de la Cruz, que hoxe chega aos cines. Unha película sobre os coidados e a soidade dos maiores encarnada na figura de Manuel, un ancián ao que só lle queda o seu can, interpretado por Manuel Manquiña.

‘O home e o can’, rodada en branco e negro e con referencias a filmes do neorrealismo italiano, aos contos de Nadal de Frank Capra ou a ‘Matar un reiseñor’, proxéctase hoxe en salas das sete principais cidades galegas e tamén en Narón, Carballo, Vilagarcía, A Estrada, Caldas, Leiro, Verín, Xinzo e Viveiro.

Sabela Caamaño e Antía Ameixeiras visitan ós estudos do Diario Cultural para presentar o seu último traballo: “Quitar o aire”.

Terceira Edición da Porto Design Biennale, o maior evento bienal de deseño da Península Ibérica.
Galicia, rexión convidada de España nesta edición. Falamos con David Barro, comisario do certame.